Istoria Kompletu Jose Luis Guterres Tur Iha Tribunal

Last Updated on Friday, 13 May 2011 09:08 Written by */CJITL Friday, 13 May 2011 08:46

CJITL inDepth, Iha loron 11 Abril 2011, Tribunál Distritál Dili ba dala uluk hala’ó julgamentu ba kazu korupsaun no abuzu puder husi autóridade estadu ne’ebé involve arguidu nain tolu, Jose Luis Guterres - JLG, Ana Maria V – ANV no Joao Freitas Camara - JFC.

Ministériu Públiku akuza arguidu JLG ne'ebe mos aktua Vice Primeiru Ministru, ho krimi korupsaun no abuzu poder, tanbá iha tinan 2006 nomeia nia espoza AMV nu’udar konseleiru iha konsuladu Timór Léste iha Nova Iorke hodi subtitui ka troka fali arguidu rasik.

Arguidu JLG momentu ne’ebá hetan fiar husi estadu TL nu’udar Minístru Negósiu Estragéiru (MNE) Timór Léste. Nomeiasaun refere akontese depoisde halo diskusaun entre autóridades iha MNE.

Depois simu kargu refere arguida AMV hato’ó proposta ba iha MNE hodi selu apartementu no saláriu staff konsuladu TL iha Nova Iorke. Totál orsamentu hamutuk USD 19,569.00 hodi selu apartementu durante tinan ida, USD 100,769.00 ba saláriu durante fulan neen.

Arguidu JFC ne'ebe mos hanesan aktual Embaxador TL ba Thailandia, momentu ne’ebá nu’udar Sek. Jerál iha MNE, asina proposta ne’ebé hato’ó husi arguida AMV.

Akuzasaun husi Ministériu Públiku mak hanesan nomeasaun ilegal (la’ós sidadaun timorense), halo riku a’an no familia, nune’é hakiak nasaun Timór Léste. Akuzasaun defini iha artigu 297 Kódigu Penál Timór Léste no lei Indonezia Nú. 31/1999, artigu 1 no 2, nomós artigu 301 no 302 Kódigu Penál Timór Léste konabá agravasaun no konseitu funsionáriu.

Prosesu julgamentu kontinua fali iha loron 14 fulan Abril 2011, tuku 09.30 dader, ho agenda rona deklarasaun husi testemuña.

Iha loron 14 Abril 2011, Tribunál Distritál Dili kontinua hala’ó julgamentu ba kazu alegasaun korupsaun no abuzu poder, Nú 266/C.ord/2010/TDD ne’ebé involve arguidu JLG, JFC, no AMV iha tinan 2006.

Prosesu julgamentu loron ida ne’e hodi rona deklarasaun husi testemuña nain 4, FML, MM, JTN no DS. Tuir depoimentu husi testemuña sira ba tribunál katak prosesu hato’ó proposta to’o pagamentu hala’ó tuir prosedura ne’ebé durante ne’e ejisti iha M NE no MF, nune’é arguidu nain 3 la iha provas atu tama ba indikasaun krime korupsaun, halo riku a’an no familia.

Mesmu nune’e, Ministériu Públiku akuza nafatin arguidu nain 3 relasiona ho krimi aktu korupsaun, halo riku a’an no familia no uja osan estadu nian tuir artigu 1 no 2 Lei Nú. 31/1999 Indonezia nian konabá korupsaun, Artigu 297 kona Abuzu poder, Artigu 301 no 302 konabá agravante husi Kódigu Penál TL. Arguidu JLG iha akuzasaun atu fo indemnizasaun orsamentu USD 9.764 ho funan, tuir artigu 1.365 no 1.367 Kódigu Sivíl Indonezia.

Tribunál marka tempu ba leitura sentensa iha loron 09 Maiu 2011, tuku 14.00.

Nune'e iha loron 09 Maiu tuku 02.00 lokraik arguido sira ne'ebe akompanya husi Advogado Sergio Hornai husi Defensoria Publiku tur hein tiha ona oras ida antes iha Tribunal hodi hein Tribunal le leitura sentensa.

Nune'e iha minutu ikus leitura nian, juis kolektivu fo sai katak arguido sira livre total tanba akuzasaun ne'ebe halo ba arguido laiha fundamentu no faktus la sufisiente atu hamonu kastigu ba arguido na'in tolu.

Jose Luis Guterres ho arguido na'in rua sira seluk la'os ona arguido no livre total ona husi akuzasaun ne'e. (Fontes JSMP/Foto TS/ Arkivu CJITL)