Jornal Nacional Diário - Segunda 29 Novembru 2010
Dili-Prezidente Repúblika (PR), José Ramos Horta husu ba lideransa jerasaun tuan sira tomak tenki kontinua hametin nafatin Unidade Nasional hodi lori dezenvolvimentu ba nasaun Timor Leste.
“Unidade Nasional tenki hametin nafatin husi jerasaun tuan,”deklara PR Horta iha nia mensajen ba nasaun Domingo, (28/11), iha Palacio Governu, hodi komemora loron indepedensia RDTL bad ala 35.
Xefi Estado afirma, dame no unidade nasional komesa metin iha Timor Leste, ne’e tamba esforsu ema tomak nian e ne’e presiza hametin nafatin ba oin.
Nia dehan, jerasaun tuan, hotu-hotu hatene katak, luta ba indepedensia, e agora tenki luta atu hametin unidade nasional para jerasaun foun kaer hodi hatutan nasaun ne’e.
Iha mensajen Presidente nia ba nasaun, nia parte foti tema mak hanesan, “Saude ho Edukasaun” tamba seitor rua ne’e importante hodi konstrui nasaun, iha sector rua ne’e, PR Horta hateten, iha tinan 8 (Ualu) nia laran progresu diak teb-tebes, ne’ebe komesa husi Primeiro Governu to’o Kuatro Governu konstituisionale hanesan, halo Hospital ne’ebe diak no uma eskola iha Distritu sira.
“Iha tinan 1999 Indonesia sai, harahun hotu kedas buat hotu-hotu ne’eduni ohin ita hare iha mudansa,”tenik nia.
Sector Saude, PR Horta apresia Governu tanba komesa haruka Estudante Timor oan ba eskola iha Cuba, Australia, Amerika, Indonesia, Fiji, Filipina, no mos iha Timor laran ke besik 1000 (rihun ida).
Planu ida ne’e, nia dehan, diak teb-tebes atu dudu sector Saude ba oin kuandu estudante hirak refere remata sira nia estuda.
Iha sector edukasaun, PR Horta preokupa liu mak kualidade professor sira nian atu hanorin estudante.
“Professor sira iha livro ka lae? kondisaun Bé mos labarik sira iha eskola iha ka lae? displina professor diak ka lae?,”dehan PR Horta.
Maske nune’e, Xefi estado konsiente katak, agora dadaun estado no Governu halo progresu barak iha sector hotu, maibe difikuldade sempre hakompania tu-tuir.
Tamba ne’e nia dehan, Orsamentu Geral Estado, tenki kontinua tau matan ba area edukasaun, Saude no mos sector importante seluk.
Iha sector Saude PR Horta apela ba inan aman sira, komunidade atu hamos foer par abele ses husi moras.
“Labele soe foer arbiru, iha Dili tomak, iha Distrito Xefi suku sira hatudu lideransa para ba sector saude ninian. Tamba se ita la halo prevensaun, la ba eskola, la hetan rezultado diak ita sei laiha jerasaun foun nebe diak para kaer nasaun ne’e,”hatutan nia.
Alende ne’e, nia husu ba joventude sira no ema tomak tenki halo prevensaun ba moras HIV/SIDA, tamba moras refere susar para atu kurtivu.
“Prevensaun ba moras ne’e fasil lo’os, sira ne’ebe kabenain, lalika buka buat seluk, dala barak akontese buat ne’e (moras HIV/SIDA) ba familia balun, feto balun kaben simu moras ne’e mai husi sira nia laen ba pasiar iha rai seluk, mai fo fali moras ne’e ba sira nia fen, e sira nia fen mos kabuki labarik oan moris kona mos moras ne’e,”tenik xefe estadu.
Tenki preven moras ne’e no moras sira seluk para jerasaun foun buras hodi kaer nasaun ne’e ba oin, PR Horta hatutan, “futuru nasan pertensia deit ba joven ne’ebe estuda, maibe joven ne’ebe gosta kaer fatuk tuda ema nia uma, halo estraga sasan, hemu lanu, nia hateten, futuru sei la pretense ba sira ne’e.
PR Horta fiar katak, iha kontekstu edukasaun, Governu sei halakon analfebetizasaun iha TL.
Komemorasaun loron indepedensia Timor leste ba 35 ne’e, Gabinete Prezidente Repúblika fahe mos medalha kondekorasaun ba Polisia nasoens Unidas, liu-liu Guarda Nasional Republikana (GNR), NGO esperansa no mos sira seluk.
Objetivo husi Medalha kondekorasaun refere, PR Horta hateten, hanesan rekonesementu ba sira nia serviso ne’ebe durante ne’e halo iha TL iha sector seguransa, saude no mos seluk-seluk.
Hatan ba ejijensia PR Horta ke husu ba jerasaun tuan tenki hametin unidade nasional, lider politika istoriku 1975 nudar mos proklamador Indepedensia RDTL, Francisco Xavier do Amaral hateten, jerasaun tuan sempre defende unidade nasional para dezenvolvimentu bele la’o iha nasaun ne’e.
“Ami sempre kaer unidade nasional metin, maibe jerasaun foun mak tenki estuda maka’as para lori nasaun ne’e ba oin,”dehan Xavier.acr
Sem comentários:
Enviar um comentário